1Pe 2 | ASO | STEP | Nemu' nene lingine goloso monovo ato ato' muki' ado' evene' go'ine izaa' ido' lutingu' monovo goloso haleko neivosa evene' lamine' gili monaa' ido' evene' maliti initekumu' lavodine lemavo muludingu' goloso gilaa' ido' gamazi di goloso igi laa' monovo ato ato' muki' nesi nene ogalone li mudise huli osu' lisa mini

1 Peter 2

Lingine Monovo Goloso Hulisa O'moso'mi Gamazi'mo Amine Lingimivo Ido' Guvelesi Ve Nene O'moso'mi Numuno Do Amuzo Molo Minaa' Neine' Geheni Ne'mine Neivo Ido' Lengi' Nene A'mine Numuno'mi Geheni Lingela Ne'mine Mini Ei' Evenele Gihile Gehepeve Minilo Lo Petolo' Lo-ngimine' Gamazi

1 Nemu' nene lingine goloso monovo ato ato' muki' ado' evene' go'ine izaa' ido' lutingu' monovo goloso haleko neivosa evene' lamine' gili monaa' ido' evene' maliti initekumu' lavodine lemavo muludingu' goloso gilaa' ido' gamazi di goloso igi laa' monovo ato ato' muki' nesi nene ogalone li mudise huli osu' lisa mini 2 O'moso'mi gamazi ne'mo lute do naba ogavo lukuvo naloningumu' ve li izipe namunolite aminemu' ngisavo iga' nani' ne'mine igi lingine a'mine lutine'mi noso' nite' aminemu' nene lingisivosavo' minilo. 3 Ne'mine igi minilizave lo noluvoni' nene lingine Guvelesi ve'mo mulumote ningo do lamine' o-ledaa' neine' monovo've'mi lanite've ningi nigilani' nemu' nene noluve. 4 A'mine Guvelesi ve nene numuno gizaa' geheni sikalahu'vesi minine' ne'mine ne neive. Evene' nete ei' nene di ningisa goloso neive li di hulani'za O'moso'mo eikumu' gilivo dizo neivosa do kegese-dine' nenaze. Eita nene igi gi'mizi minilo. 5 Ne'mine igisa lingine nene numuno gizaa' geheni sikalahu'vesi minine' ne'mine lili' igi minikevo O'moso'mo ei' Sikalahu've'mi numu've lolo' o-lengedelize. Guvelesi vela igi gi'mizilo. Ido' ne'mine igisa lingine O'moso'mi numungu' gono di-dilisa kekeize li minani' zuho lili' igi mono' numuno nabau' O'moso inite' lehizi-daa' ani' ne'mine igi O'moso'mo Izesu Kilisito' gono dangumu' gelosa ninge lamine' daline' inite' nene lengi' lutinguti' nene di soto' igi lehizi-dilizave. 6 Mene noluvoni' nene mo lamineto' mono' godolou' O'moso'mo line' gamazi ti' li gizi nizado' nene e'meto noluve:

Lingine gili'nalo.
Naza numuno gizaa' geheni mamu' nene giluvo dize neivosa
a'mine geheni nene numuno do amuzo molaa' geheni minelive losa
do kegeso neni' evene'ne zuhoti ebe'nine Zaioni golo neu'
ado' engi' vovo'ningu' gehepeve nene nohulo-duve.
Ido' ezemu' gili ele'vole' ilizave muki' nene
gili ele'vole' ilizani' ne'mi gihile nene soto' amivo
ngovozo ma hilamilisave.
7 Ido' a'mine geheni nene mo dizo neive noluvoni' nene lingine ezemu' gili ele'vole' i nizave nene ezemu' gilavo dize neivosa nene noluha evene' ma ezemu' gili ele'vole' amavela nene mono' godolou' ti' li gizi nizani' gamazi malo' nene mo gihile izave:

Numuno gizilizani' geheni mukikuti' nene geheni ma
numuno gizaa' avelite ningisa goloso o vive li di hulani' geheni ne'mo
geheni muki' ngivile' ogo numuno do amuzo molaa' geheni lolo' ogave.
8 Ido' ma nene:

A'mine geheni nene evene' lodoho' izi limi pou' li
ingalizani' geheni gehepeve ne neive.
Ingine lodoho' izi limi ingaa' nani' nene O'moso'mi gamazi gili damadi'mo nene limi ingaa' nave. O'moso'mo ingine mo ne'mine ilizave lo gele neido' nene ne'mine iga' nave.

9 Ne neiha lingine neve nene mo O'moso'mo ei' ve lo do kegesine' zuho mini Guvelesi ve naba'mi mono' gono di-di inite' lehizi-daa' aveliti muliseuti' mini O'moso'mo ei' ve lo do kekeize lo-lengede neine' zuho nene nizave. Ido' ne'mine nizani' nene vode vavo lehelele izeline' labana'veu' nene liti'musouti' elese molo-lengedo lengele'mize molavemu' nene opo'ni li guvele li soto soto' ilizangumu' nene ne'mine aleve nene nizave. 10 Gomu' lingine evene' numuno gulivetine minamivo gopo minani'za idise nene numuno gulivetine O'moso'mi evenele zuho ve lisa nene nizave. Gomu' nene O'moso'mo isete izo nasahili' o-ledaa' ine' monovo've nene lengita hetelamivo minani'za idise nene mo lengita ogo hetelavo a'mine'mi lulou' nene nizave.

Lingine Nene O'moso'mi Gelekele' Ve've Minii Monovo Lisihe' Laminekovo' Igi Mili Minikevo O'mosomu' Gilamave Nete A'mine Monovotine Lamine' Nene Ningisa O'moso Opo'ni Lilizado' Mini Mili Minilo Lo Lo-ngimine' Gamazi

11 Lingine lu'ne lengeme nouvoni' alevekizo, me misubou' aleve minami gamene li'nibemukovo' a'mida mene minilizani' nenako okodine'mo me misubou' initekumu' lanite' giline' nene gili hulilo. Okodine'mo ne'minemu' giline' ne'mo lutine nene ivile' olosa lovo o emaa' neinaze. Lingine gili hulilo lo nolo-lingiduve. 12 O'moso'mi evenele minamaveti zuhoti vovo'ningu' minilizangu' lingine igi mili ilizani' nene mo monovo lisihe' laminekovo' nene igi mili minilo. Ee, ingine lengikumu' evene' goloso ve li divi ledivi' i-lingidi laa' naha ne'mine i-lingidi minilizangukisi monovo lamine' igi mili iga' ilizani' nene ningi mini' mini' ilizadi'mo O'moso'mo monovo'nido' ogo do ningeline' gamenelo' ingine nene a'mine monovote laminekumu' O'moso opo'ni lilizangumu' ve li monovo lisihe' laminekovo' igi mili minilo.

13 Guvelesi ve'mo ningivo lamine' ilingumu' ve li lingine evenelite amuzo ato ato' ngimani' aleve muki' nene gelekele' i-ngidivo' minilo. Ado' evene' linge muki' ngivile' ogo minive guvelesi ve naba gehepeve nolihe 14 ido' a'mine guvelesi ve naba ne'mo ingine evene' monovo goloso ilizave lihime ngemaa' gonosi ido' monovo lamine' ilizave ngopo'ni laa' gono nesi nene dalizave lo ngele'mize molave ngamani naba nilizahe muki' nene gelekele' i-ngidivo' minilo. 15 Ido' lingine gelekele' i-ngidivo' minilizave noluvoni' nene O'moso'mo ti' lo gele neingumu' nene noluve: Ado' lingine monovo lisihe' lamineto' e'meti minilizadi'mo evene' negi ado' gamazi monovo gilamavete divi ledivi' i-lingidaa' nave neti ve'nido' nene humo izi-ngidikevo gohi lamilisave lo gele neive. 16 Lingine Mose' louli'mi gesi mingu' mini nalato' ve gili minanguti' kuluhizi nizani'za a'mine louli'mo adelo' damivo fili o none' nenako nemu' nene monovo ato ato' muki' nene lihime've nomivo gopo ha olosune lisa monovo goloso dikelizave. Ne'mine amilo. Asi O'moso'mi gelekele' ve mini ei' lulolokovo' igi mili minilo. 17 Ado' evene' mukikumu' gilavo dizivo mini Kilisito' evenele leli' zuho muki' nene lutine ngimi mini O'mosomu' golise gili mini a'mine me misubou' guvetinesi ve naba minive nene di naba i-di gili imi minilo.

Gonou' Aleve Nene Gelekele' Igi Gono Lamine' Di Minilizangu' Hazalo' Mulumo Gono Ma nGimilizani' Nene Kilisito' Engikumu' Mulumo Gono Ha Gihine' Monovo'velo' Nene E'meti A'mine Mulumo Gono Nene Ha Gihilizangumu' Lo-ngimine' Gamazi

18 Gonolo' gipe alu lingine lengehelele gehepeve izivo mini metinge gizebo vetine nene gelekele' i-ngidivo' minilo. Ado' gizebo vetine ve lamine' hongu ve ne'mine minilizanikovo' gelekele' i-ngidi minilizavoba asi metinge gasava ve minilizani' nesi nene ha gelekele' i-ngidivo' minilo. 19 Ee, evene' ma inite' ma do goloso amilido' hazamu' mulumo gono imikevosa aza hongu lo mino a'mine mulumo nene O'mosomu' gele mino ha geheline' nene O'moso'mo ezemu' gelavo lamine' oloseive. 20 Ne neiha lingine inite' ma di goloso ikevo a'minemu' lihime lingimi gavoso nilingibilavo lingine hongu li mini ha gihilizani' nemu' nene longopo'ni lilizado' minilizahe. O'ove. Longopo'ni lamilisani'za lingine inite' lisihe' lamine' ma ikevo gavoso nilingibilavo lingine hongu li ha gihilizani' nene O'moso'mo ningivo lamine' oloseive. 21 Ido' ne'mine ilizave lo noluvoni' nene O'moso'mo ne'mine ilizave lo elese molo lengele'mize molani' nenako nemu' noluve. Ido' O'moso'mo ne'mine ine' nene Kilisito' azasi lingine neni' ogo molo uvodo' api' napi' igi igi mili minilizave lo avazaha pikisa ne'mine bele molo lengito' medelo mulumo gono gihine' nenako nemu' nene O'moso'mo linginesi ne'mine ilizave losa elese molo-lengedave. 22 A'mine ogo molo minido' api' napi' igi e'metilizave Kilisito'

aza nene lihime ma damine' ma neive.
Ido' go'ine izo soza gamazi veleuti' livo evene' hamoli'mosi ma gelamine' ve.
23 Evenelite divi ledivi' igi elemado' nene do velepe' izo aza a'mido' do goloso o-ngedo ngelemesa'mine' ve. Ido' mulumo nite' i-dado' nene golo hizo golise gililiza gamazi lo-ngedamo asi goni' do lisihe' ogovo' gelaa' ive O'moso'mi anaukovo' molosa ezelo' lehete o minaa' ine' ve. 24 Ido' leli' nene lihime mudise hulisa monovo lisihe' laminekovo' igi mili minivi' alivi' ilizangumu' ve losa asi've nene leli' lihimete ei' oko'nolo' geho a'minemu' nene lohoto' zalo' hiline' ve. Ei' biladi'mo lingine nene mo lamine' ikeve. 25 Ido' naza ne'mine noluvoni' nene lingine sipisipi ize ne'mine mini vi gopo igi minani'za idise mini velepe' izi lengi' lutine'mi noso nite' eme'mo vo a'mido' gizebo o-lengedelivela igi gi'mizikeni' nizani' nenako nemu' nene noluve.